ताजा अपडेट

समचार

अमेरिकाको बाल्टिमोरका बालकको ११ घण्टाको शल्यक्रियापछि दुईवटा नयाँ हात पाए

साउन ४ – अमेरिकाको बाल्टिमोरका १० वर्षका बालकले चिकित्सा इतिहासमा नाम लेखाउन सफल भएका छन् । मेरील्याण्डको बाल्टिमोरका १० वर्षे जायोन हार्बीले चार समूहमा रहेका डाक्टरले लगातार ११ घण्टाको शल्यक्रियापछि दुईवटा नयाँ हात पाएका छन् । दुई वर्षको हुँदा संक्रमणका कारण दुवै हात गुमाएका जायोनले प्रत्यारोपण मार्फत नयाँ हात पाएका हुन् । विश्व चिकित्सा इतिहासमा प्रत्यारोपण मार्फत दुवै हात पाउने उनी पहिलो व्यक्ति हुन् । खेलकुद मनपराउने जायोन अहिले आफ्नो नयाँ हातको सहायताले स्वतन्त्रताको मजा लिइरहेको जायोनको उपचारका बारेमा बुधबार प्रकाशित भएको पहिलो चिकित्सा जर्नल प्रतिवेदनमा उल्लेख गरिएको छ । प्रतिवेदनमा जायोनको उपचार सफल भएको घोषणा गरिएको छ । जायोनको उपचारमा भएको सफलताले यस्तै खालको समस्या रहेका अरु बालबालिका पनि लाभान्वित हुन सक्ने उपचारमा संलग्न डाक्टरले बताएका छन् । उनको दुईवर्षअघि प्रत्यारोपण सल्यक्रिया भएको थियो । जायोन अहिले आफ्नो व्यक्तिगत काम आफै गर्न सक्ने भएको फिलाडेलफियामा रहेको ल्यानसेट चाइल्ड एण्ड एडोलेसेन्ट स्वास्थ्य अस्पतालले जनाएको छ । दान गर्ने व्यक्तिको अंग लिने व्यक्तिको शरीरले स्वीकार गर्न कठिन हुने भएकाले अंग प्रत्यारोपण चुनौतिपूर्ण बन्ने गरेको छ । सन् २०१५ को जुलाईमा जायोनको हात प्रत्यारोपण शल्यक्रिया भएको थियो । अहिले उनको हातमा राम्रो सुधार आएको र उनी बेसबल खेल्न सक्नेसम्म भएका छन् । विश्वमा अहिलेसम्म एक सयजना भन्दा धेरैको हात तथा पाखुराको भाग प्रत्यारोपण गरिएको छ । पहिलो पटक सन् १९९८ मा एक व्यक्तिमा हात प्रत्यारोपण गरिएको थियो । सन् २००० मा मलेसियामा भर्खरै जन्मिएकी एक बालिकाले हात तथा पाखुरा प्रत्यारोपण मार्फत पाएकी थिइन् । उनलाई सँगै जन्मिएकी जुम्ल्याहा बहिनी (जसको निधन भएको थियो) को हात तथा पाखुरा प्रत्यारोपण गरिएको थियो । तर दुवै हात प्रत्यारोपण गरेर सफल भएको जायोन नै पहिलो हुन् । 

- तस्बिरः पिए, एसडब्लुएनएस, द ल्यानसेट

Top