ताजा अपडेट

समचार

दक्षिण कोरियाको जवाफी मिसाइल प्रहार, उत्तरको भविष्य नरहने जापानको चेतावनी

Hem Bishwakarma

उत्तर कोरियाले फेरि जापानतिर लक्षित गर्दै मिसाइल छाडेपछि जवाफमा दक्षिण कोरियाले पनि निर्धारित् लक्ष्यमा दुई ब्यालेस्टिक मिसाइल प्रहार गरेको छ ।

 

उत्तरले गरेको परीक्षणको केही समयपश्चात् प्रतिक्रियास्वरुप दक्षिणले दुईओटा ‘ह्युन्मू–२’ नामक ब्यालेस्टिक मिसाइल निर्धारित् लक्ष्यमा सफलतापूर्वक प्रहार गरेको जोइन्ट चिफ्स अफ स्टाफको कार्यालयले बताएको छ ।

दक्षिण कोरियाली रक्षा मन्त्रालयले उत्तर कोरियाले प्रहार गरेको मिसाइल हावामै रहँदा दक्षिण कोरियाले प्रतिक्रियास्वरुप दुईओटा ब्यालेस्टिक मिसाइल पूर्वी सामुद्रिक द्वीपमा प्रहार गरेर कडा जवाफ दिएको बताएको छ ।

उक्त मिसाइल २५० किलोमिटर पार गरेर सफलतापूर्वक निर्धारित् लक्ष्यमा पुगेको उल्लेख छ ।

उत्तर कोरियाले शुक्रबार सुनान जिल्लाबाट जापानतिर दोस्रोपटक हानिएको मिसाइल ७७० किलोमिटरको उचाईसम्म पुगेको र झन्डै ३७०० किलोमिटर टाढा पुगेको दक्षिण कोरियाको सेनाले जनाएको छ । मिसाइल जापानको होकाइदो द्वीपलाई नाघेर गएको थियो ।

उत्तर कोरियाको परीक्षणलगत्तै जापानी प्रधानमन्त्री सिन्जो आबेले उत्तेजित बनाउने यस्तो कार्य उत्तर कोरियाले बन्द नगरे त्यसको दूष्परिणाम व्यहोर्नुपर्ने चेतावनी दिएका छन् ।

उनले यस्तो दुष्कार्य कुनै हालतमा पचाउन नसकिने भन्दै यही बाटो हिँडिरहे उत्तर कोरियाको भविष्य नरहने चेतावनी दिए । जापानले आफ्ना नागरिकलाई सुरक्षित रहन आग्रह गरेको छ ।

त्यस्तै, अमेरिकी विदेशमन्त्री रेक्स टिलरर्सनले उत्तरको यो कार्यप्रति चीन र रुसले सही जवाफ दिनुपर्ने बताएका छन् ।

दक्षिण कोरियाले राष्ट्रिय सुरक्षा परिषदको आपत्कालीन बैठक पनि बोलाएको छ ।

संयुक्त राष्ट्रसंघले उत्तर कोरियाविरुद्ध थप कडा नाकाबन्दी लगाएपछि जवाफमा यो परीक्षण गरेको बताइएको छ ।

सोमबार संयुक्त राष्ट्रसंघ सुरक्षा परिषदले उत्तर कोरियाविरुद्ध थप नाकाबन्दी लगाउने प्रस्ताव पारित गरेको थियो ।

आफ्नो अर्थतन्त्रमै असर पार्नेगरी लगाइएको नाकाबन्दीको विरोधमा कडा जवाफ दिने उत्तर कोरियाले जनाएको थियो । नाकाबन्दीको प्रस्ताव गर्ने अमेरिकाले ठूलो मूल्य चुकाउनुपर्ने चेतावनी उत्तरले दिएको थियो ।

संयुक्त राष्ट्रसंघसहित विश्व समुदायले विरोध गर्दागर्दै पनि उत्तर कोरियाले सन् २००६ देखि नै निरन्तररुपमा आणविक क्षेप्यास्त्र परीक्षण गर्दै आएको छ । (एजेन्सी)

Top