समचार

संविधान दिवसमा राष्ट्रपति र प्रधानमन्त्रीले दिए शुभकामना,

चीन र भारतबाट आयो सन्देश

 

राष्ट्रपति विद्यादेवी भण्डारीले संविधान दिवसको शुभकामना दिँदै नेपाली जनताको लामो संघर्ष, बलिदान र प्रतीक्षापछि प्राप्त गरेको संविधान कार्यान्वयन गर्दै लैजानुपर्ने बताइन् ।

 

उनले आजको दिनले राष्ट्रिय एकताको जगमा शान्त, समुन्नत र समृद्ध संघीय लोकतान्त्रिक गणतन्त्र नेपाल निर्माणमा थप प्रेरणा मिल्ने विश्वाससमेत व्यक्त गरेकी छन् ।

 

यसैगरी उपराष्ट्रपति नन्दबहादुर पुनले संविधान दिवसको शुभकामना दिँदै संविधानको पूर्ण कार्यान्वयनसँगै राजनीतिक संक्रमण पूर्ण अन्त्य भई देश आर्थिक समृद्धिको यात्रामा अघि बढ्ने विश्वास व्यक्त गरेका छन् ।

 

यसैगरी प्रधानमन्त्री शेरबहादुर देउवाले संविधान दिवसले आफ्नो अधिकार र कर्तव्यप्रति सचेत रहँदै राष्ट्रिय एकता र समृद्धिको मार्गमा हिँड्न प्रेरित गरोस् भन्ने कामना गरेका छन् ।

 

संविधान जीवन्त र गतिशील दस्तावेज भएको भन्दै प्रधानमन्त्री देउवाले यसलाई जीवन्त राख्न असल राजनीतिक संस्कार, नागरिक सचेतना र सुशासन अपरिहार्य रहेको उल्लेख गरेका छन् ।

 

यसैगरी विभिन्न राजनीतिक दलका नेताहरुले संविधान दिवसका अवसरमा शुभकामना सन्देश दिएका छन् ।

 

यसैबीच संविधान दिवसका अवसरमा छिमेकी मुलुक भारत, चीनलगायत देशले शुभकामना सन्देश पठाई संविधानको सफलताको शुभकामना व्यक्त गरेका छन् ।

 

भारतका राष्ट्रपति श्रीरामनाथ कोविन्द र प्रधानमन्त्री नरेन्द्र मोदीले नेपालका राष्ट्रपति विद्यादेवी भण्डारी र प्रधानमन्त्री शेरबहादुर देउवालाई शुभकामना सन्देश पठाउँदै संविधान कार्यान्वयनको शुभकामना दिएका छन् ।

 

त्यसैगरी चीनका राष्ट्रपति सि जीन पिङ र प्रधानमन्त्री लि छख्याङले संविधान दिवसका अवसरमा राष्ट्रपति र प्रधानमन्त्रीका नाममा छुट्टाछुट्टै शुभकामना सन्देश पठाई यस अवसरमा दुई देशबीचको कूटनीतिक सम्बन्धलाई थप उचाइमा पुर्‍याउन मद्दत पुगोस् भनी कामना गरेका छन् ।

Top